საქართველოს ენერგეტიკული ბირჟის ამოქმედებასთან, საბალანსო და დამხმარე ბაზრებთან დაკავშირებით სამუშაო შეხვედრა შედგა
შპს „ენგურჰესის“ ორგანიზებით, საქართველოს ენერგეტიკული ბირჟის ამოქმედებასთან, საბალანსო და დამხმარე ბაზრებთან დაკავშირებულ აქტუალურ საკითხებზე სამუშაო შეხვედრა შედგა. თითოეულმა მონაწილე მხარემ აღნიშნული თემების შესახებ საკუთარი მოსაზრება პრეზენტაციის სახით წარადგინა. შეხვედრა კითხვა-პასუხის რეჟიმში წარიმართა. მხარეებმა საქართველოს ენერგეტიკული ბირჟის ამოქმედების მიმართულებით არსებული გამოწვევები, მოსალოდნელი შედეგები და თითოეული მონაწილე ორგანიზაციის როლი განიხილეს.
სამუშაო შეხვედრას შპს „ენგურჰესის“ დირექტორთა საბჭოს თავმჯდომარე ლევან მებონია, ამავე ორგანიზაციის დირექტორთა საბჭოს წევრები, ენერგეტიკული ბირჟის, ელექტროენერგეტიკული ბაზრის ოპერატორის, საქართველოს სახელმწიფო ელექტროსისტემისა და საქართველოს ენერგეტიკისა და წყალმომარაგების მარეგულირებელი ეროვნული კომისიის წარმომადგენლები ესწრებოდნენ.
