ენგურჰესი – უნიკალური არქიტექტურული ნაგებობის, ბუნებრივი ლანდშაფტისა და უდიდესი ტურისტული პოტენციალის სინთეზი

თაღოვანი კაშხალი საექსპლუატაციოდ 1977 წლის 22 დეკემბერს გადაეცა. სწორედ ამით დაიწყო ენგურჰესის დიდი სიცოცხლე. თაღოვანი კაშხლის აშენებამ და მდინარე ენგურის გადაკეტვამ წარმოშვა ჯვრის წყალსაცავი, რომლის მოცულობა მილიარდ ასი მილიონ კუბურ მეტრს შეადგენს.

თაღოვანი კაშხლის ფორმები და გაბარიტები, საკუთარ შთამბეჭდავობასთან ერთად, ბუნებრივ და ლოგიკურ კითხვებსაც აჩენდა: ასეთი მასშტაბის მიუხედავად, გაუძლებდა თუ არა კაშხალი მილიარდ ასი მილიონი კუბური მეტრის მოცულობის წყლის დაწოლას?

ჰიდროლოგების პასუხი მტკიცე და ეჭვმიუტანელი იყო: „აიგება გრანიტის კედელივით შეუვალი სიმაგრე. მომავალი თაობები ნახავენ ამ კაშხალს, როგორც მეოცე ასწლეულის ურთულესსა და უბრწყინვალეს ნაგებობას!“
ენგურჰესის თაღოვანი კაშხალი ჰიდროტექნიკური ნაგებობაა, რომლის საშუალებითაც მდინარე ენგურის ხეობა ზემო წელშია გადაკეტილი. ის დაბა ჯვრიდან 5 კილომეტრის დაშორებით მდებარეობს. ენგურჰესის თაღოვანი კაშხალი არის ბეტონის ნაგებობა, რომლის სიმაღლე 271,5 მეტრია, თხემის სიგრძე კი – 728 მეტრი.